Policia franceze ka bastisur shtëpitë e dhjetëra radikalëve të dyshuar islamikë pas prerjes së kokës së një mësuesi, që u tregoi karikaturat e Profetit Muhamed nxënësve të tij.
Disa nga ata që merren në pyetje besohet se kanë postuar mesazhe mbështetjeje për vrasësin e Samuel Paty.
Qeveria, gjithashtu, tha se po hetonte 51 shoqata myslimane franceze. Vrasësi i dyshuar i mësuesit Paty u qëllua për vdekje nga policia, të premten.
Të hënën, ministri i Brendshëm, Gérald Darmanin, tha se operacionet pritej të vazhdonin gjatë gjithë javës dhe se nuk kishte “pushim për armiqtë e republikës”
Ai tha se jo të gjithë individët e shënjestruar në operacione ishin domosdoshmërisht të lidhur me hetimet për vdekjen e z. Paty.
Ndërkohë, policia do të intervistojë rreth 80 persona të cilët besohet se kanë postuar mesazhe në mbështetje të vrasësit të z. Paty, shtoi z. Darmanin.
Qeveria franceze paralajmëroi organizatat myslimane nën hetim, se nëse do të zbulonin që ato nxisnin urrejtjen, do të mbylleshin.
Shoqatat përfshijnë Kolektivin Kundër Islamofobisë, (Collective Against Islamophobia) për të cilin qeveria beson se përhap një mesazh të përhershëm kundër shtetit francez.
Në faqen e internetit, Kolektivi Kundër Islamofobisë e përshkruan veten si një “organizatë për të drejtat e njeriut, misioni i së cilës është të luftojë Islamofobinë” në partneritet me Kombet e Bashkuara midis institucioneve të tjera.
Mësuesi Paty u vra në periferi të Parisit Conflans-Sainte-Honorine. I dyshuari ishte një 18-vjeçar i lindur në Moskë me origjinë çeçene, nuk kishte asnjë lidhje me z. Paty, ose shkollën.
