Partia Socialiste nuk tërhiqet nga vendimi për të importuar mbetjet në vendin tonë.
Kreu i Komisionit të Veprimtarisë Prodhuese, një nga iniciatorët e ligjit për importin e mbetjeve, Eduart Shalsi duke folur për mediat pas një takimi me përfaqësues të shoqërisë civile, përsëriti se ligji është në përputhje me ato të BE-së, ndërsa foli për të tjera lehtësira për ricikluesit vendas, siç është heqja e taksave.
“Duam të incentivojmë grumbullimin e mbetjeve në vend. Ky ka qenë fokusi dhe mbetet sfida jonë. Shtyjmë bashkitë që të përshpejtojnë ndarjen e mbeturinave në burim. Jemi gati për ndihmë. Unë do të doja bashkë me kolegët e mi të ftonim cilindo specialist apo të shqetësuar për të sugjeruar, për të komentuar dhe jemi në kohë dhe të hapur për çdo lloj sugjerimi që i shërben qëllimit madhor pastrimit të Shqipërisë”, tha Shalsi.
I pyetur për propozimin e kreut të PD-së, Lulzim Basha për moratorium për importin e plehrave deri sa qytetarët të shprehen me referendum, Shalsi u përgjigj me ironi: “Po diskutojmë çështje serioze”.
Ironia vjen pikërisht nga një person që është kthyer në humorin e rrjeteve sociale, ndërkohë që ka akuza të rënda se pas importit të mbetjeve fshihet grupime mafioze.
