Kryeministri Edi Rama ishte në Shkodër sot ku janë shpërndarë kartat e reja të anëtarësimit. Ndërsa e nisi fjalën e tij duke sulmuar opozitën, Rama tha se e vetmja ofertë e PD është përbaltja.
Madje kryeministri nuk ka ngurruar të përdorë edhe zhargonin “ata që s’na duan, të na marrin të keqen”. Gjithashtu, kryeministri tha se Shqipëria nuk ka opozitë, por ka dy qeveri, ajo e vjetra dhe kjo e reja.
“Ata nuk janë opozitë. Shqipëria nuk ka opozitë, por ka dy qeveri. Një që ra nga kali dhe një që po bën detyrat e saj”, tha Rama. Ai më pas krahasoi PD-në me një te dehur që shan dhe përflet këdo. “Çdo lagje e ka një të dehur që del nga shtëpia tapë dhe që rri dhe shan të gjithë që i shkojnë nëpër mend. Kështu është dhe PD-ja”, tha Rama.
Rama shkëmbeu batuta edhe për vizitën që ai ka patur në Shkodër pak ditë më parë, ku u takua me kryetaren e Bashkisë, Voltana Ademi. “Kur hyra në Bashki, më thanë që je i pari komunist që hyn në Bashkinë e Shkodrës. Por mendoj që jam i dyti, se i pari ka qenë Saliu”, tha Rama.
(Boldnews)
