Pas 18 ditësh, dhjetë naftëtarë të Ballshit kanë lënë grevën e urisë në gjendje të rënduar shëndetësore, pas rekomandimit të mjekëve.
Në vend të tyre, do të nisin grevën naftëtarë të tjerë, mes të cilëve shumica do të jenë gra.
Naftëtarët janë shprehur të vendosur për të mos u tërhequr nga kërkesa e tyre, për marrjen e pagave të prapambetura prej më shumë se një viti.
Ata i kanë bërë thirrje qeverisë që të ndërhyjë, por kryeministri Rama është shprehur se bëhet fjalë për një marrëdhënie mes naftëtarëve dhe kompanisë private, dhe nuk e ka një zgjidhje për problemin e tyre.
Një ditë më parë, një grup naftëtarësh u takuan me përfaqësues të firmës, e cila pretendon se ka në administrim Uzinën e përpunimit të thellë të naftës në Ballsh. Kreu i Sindikatës së Naftëtarëve, Sokol Dautaj deklaroi se gjatë takimit ka pasur premtime boshe dhe nuk është ofruar asnjë zgjidhje për pagat e prapambetura e rifillimin e punës. Për këtë arsye, shtoi ai, greva do të vazhdojë.
