Presidenti Ilir Meta i është përgjigjur deklaratave të kryeministrit Edi Rama.
Më herët gjatë kësaj të Marte, në një konferencë për gazetarët, teksa fliste për vendimin për mbajtjen me detyrim të maskave, Rama përmendi Presidentin Ilir Meta. “Unë kam zgjedhur ti vë (maskës) trëndafilin e 25 Prillit, që është trëndafili i socialistëve, lulja e bukur. Ilir mund të vëri Vojo Kushin, secili vë ça ka qejf, ose s’vë asgjë fare”, tha Rama.
Në përgjigje, kreu i shtetit e quan Ramën “Esatin e Rilindjes” dhe i kërkon sërish përballje.
“Esati i Rilindjes, zëdhënësi i armiqve të Kombit Shqiptar, guxoi sërish sot të marrë nëpër gojë Vojo Kushin, duke ofenduar për të disatën herë Dëshmorët e Atdheut, familjarët e tyre, veteranët dhe të gjithë shqiptarët që nderojnë dhe krenohen me vlerat e Luftës Antifashiste Nacionalçlirimtare. Esati i Rilindjes, pengu i armiqve më të egër të Kombit Shqiptar, që ka nxjerrë në shitje Shqipërinë dhe Kosovën provoi para të gjithë shqiptarëve për të disatën herë se i urren Dëshmorët dhe Heronjtë e Atdheut, si Vojo Kushi, që kanë sakrifikuar gjithçka, duke falur edhe jetën e tyre, për Atdheun! Esati i Rilindjes, armiku më i egër i socialistëve idealistë, guxoi sot të fyejë edhe simbolin e tyre dhe të Partisë Socialiste, trëndafilin e kuq si gjaku, që prej kohësh e ka zëvendësuar me gjethen e kanabisit dhe barin e egër të Rilindjes, që rritet në llumin e oligarkisë dhe bandave”, shkruan Meta në një postim në FB.
“Esati i Rilindjes duhet ta ketë të qartë se numërimi mbrapsht për të dhe Sektin pa nder, pa vlera e pa Atdhe që përfaqëson, ka filluar dhe NUK DO NDALET! TRE MILIONË ILIRË NË 25 PRILL I KA GATI! Dhe nuk më thua, o trendi buburrec, kur do dalësh në përballje me mua? Mezi po të pres”, shton kreu i shtetit, teksa poston dhe një karikaturë, ku personazhet janë ai dhe Rama.
