Presidenti Donald Trump pas tre netësh në spital duke u trajtuar për Covid-19, u rikthye në Shtëpinë e Bardhë duke hequr maskën dhe duke e vendosur në xhep. Kjo sjellje mund të jetë një panoramë e qindra mijërave njerëzve nëpër botë.
YouGov zhvilloi një sondazh duke pyetur njerëz nga 24 shtete për masat që kanë marrë për të shmangur infektimin me koronavirus. Rezultatet treguan se ata janë më pak vigjilentë se disa muaj më parë.
Në fillim të pandemisë, në prill gati dy të tretat e të anketuarve pranuan se po shmangnin prekjen e objekteve në publik. Në shtator kjo kryhej nga vetëm gati gjysma e qytetarëve. Një ndryshim i tillë është vënë re dhe në një sërë masash të tjera si larja e duarve, distancimi social në hapësirat publike apo karantimi.
Megjithatë u vu re një ndryshim midis vendeve aziatike dhe europiane. Të parët vazhdojnë ndjekjen e masave me përpikmëri pavarësisht uljes së mbështetjes me 6%. Në vendet e Europës perëndimore, nordike apo Amerikës së Veriut, ndjekja e distancimit social ka rënë me 12%.
Sidoqoftë, në një aspekt Trump është një rast i veçuar. Nëse ka një gjë për të cilën njerëzit në të gjithë botën gjithnjë e më shumë bien dakord, është rëndësia e maskave.
Në Europën Perëndimore dhe Amerikën e Veriut, pjesa e njerëzve që thonë se mbajnë maskë në vende publike është rritur nga një mesatare prej 27% në Prill në 75% në Shtator.
Presidenti duket se e pa hedhjen e maskës së tij si një gjest të triumfit mbi virusin. Por shumë do ta shohin atë si një demonstrim pse udhëheqja e Trump për luftën kundër pandemisë ka qenë e gabuar.
