Ish-ministri i Jashtëm Edmond Haxhinasto, i ftuar në “Abc-ja e mëngjesit”, ka reaguar lidhur me progres-raportin e Këshillit Evropian për Shqipërinë.
Ish-deputeti i LSI u shpreh se ka ardhur koha që raportet e BE të jenë më të drejtpërdrejta lidhur me problematikat.
“Jo se nuk pasqyrohen problemet, por duhet të jenë me një gjuhë më të drejtëpërdrejtë”, tha Haxhinasto.
“BE ka ngritur radarët edhe për vende të tjera evropiane. Në raport prisja një dozë më të madhe realizmi, një gjuhë më të drejtpërdrejtë. Vendet anëtare kryesisht Gjermania, ka peshë specifike në BE që çështjet e demokracisë, të tregut të lirë dhe të të drejtave janë shumë të vlefshme dhe i duan themelet e të gjithë ngrehinës. Si mund të kalojë kjo cilësi e sistemit në Shqipëri pa tërhequr vëmendjen në Shqipëri”, theksoi ai.
Lidhur me ndryshimet në Kodin Zgjedhor, Haxhinasto theksoi se me këto ndryshime ligjore dhe Kushtetuese synohet që mazhoranca të mbahet fort pas pushtetit.
“Shqipëria nuk është në paqe politike. Pasojat që vijnë nga arroganca dhe për të përdorur të gjithë instrumentet ligjore është sepse demokracia nuk është vullneti i një ane të politikës, është vullneti i të gjithë pjesëve të politikës që vendosin rregullat e lojës. Kjo nuk ka ndodhur ndonjëherë që njëra anë e politikës vendos rregullat dhe thotë hajde luajmë”, tha Haxhinasto.
Gjatë bisedës në studio ai më tej theksoi se dhe paqja e vërtetë politike vendoset pas zgjedhjeve të lira të ndershme.
“Kjo është sfida sot, vendosja e një realiteti të ri politik ku qytetarët zgjedhin përfaqësuesit e tyre. Unë nuk shoh nga mazhoranca të ushtrojë detyrën e saj për paqe apo integrim. Integrimi është ngritja e institucioneve demokratike dhe jo të shkatërrosh gjithçka në funksion të pushtetit”, tha ai.
