Kryeprokurori Olsian Çela deklaroi këtë të Hënë se, krimi po kontrollon Elbasanin dhe jetën ekonomike të vendit.
Sipas Çelës, kjo që po ndodh është maja e ajsbergut.
“Niveli i krimit të rëndë dhe organizuar në Elbasan po rritet. Po vihet se re krimi po kontrollon qytetin dhe jetën ekonomike. Kërkojnë vëmendje të veçantë dhe përgjigje ekzemplare nga shteti. Një qytet s’mund të kthehet në vend për luftë mes bandash për kontroll territoresh apo për hesapet mes tyre. Kjo që ndodh është maja e ajsbergut”, tha kreu i Prokurorisë së Përgjithshme.
“As Elbasani dhe as qytete të tjera nuk mund të merren peng nga këto grupe”, shtoi ai, pas takimit me prokurorët në Elbasan.
Gjatë takimit me prokurorët, Çela kërkoi koordinim më të mirë të punës mes Prokurorisë, strukturave të Policisë së Shtetit dhe agjencive të tjera ligjizbatuese për të dhënë rezultate konkrete në goditjen ndaj kriminalitetit, thanë burime zyrtare nga Prokuroria e Përgjithshme.
