Qeveria i ka kaluar 179 mln lekë për inceneratorët, ndërsa shuma i është zbritur nga fondi “Furnizimi me ujë dhe kanalizime”.
Vendimi në fjalë merret në fillim të vjeshtës, periudhë e karakterizuar nga reshjet dhe që edhe ditët e fundit krijuan përmbytje në disa prej qyteteve të vendit. Por jo vetëm kaq, ky fond ishte i parashikuar edhe për furnizimin me ujë të qytetarëve, të cilët edhe pse në 2020 vijojnë të presin ujin me orar.
Por duket se kjo nuk ka rëndësi për Qeverinë, e cila me një vendim ka firmosur kalimin e fondit për “Menaxhimi i mbetjeve urbane”.
Vendimi i Qeverisë
Në mbështetje të nenit 100 të Kushtetutës, të nenit 44, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.88/2019, “Për buxhetin e vitit 2020”, të ndryshuar, me propozimin e ministrit të Infrastrukturës dhe Energjisë, Këshilli i Ministrave
V E N D O S I:
1. Në buxhetin e vitit 2020, miratuar për Ministrinë e Infrastrukturës dhe Energjisë, të bëhet rishpërndarja e fondeve ndërmjet programeve buxhetore, si më poshtë vijon:
a) Në programin buxhetor 06370 “Furnizimi me ujë dhe kanalizime”, artikulli 231 “Shpenzime kapitale të trupëzuara”, zëri “Shpenzimet kapitale me financim të brendshëm”, pakësohet fondi prej 179 000 000 (njëqind e shtatëdhjetë e nëntë milionë) lekësh.
b) Në programin buxhetor 06220 “Menaxhimi i mbetjeve urbane”, artikulli 231 “Shpenzime kapitale të trupëzuara”, zëri “Shpenzimet kapitale me financim të brendshëm”, shtohet fondi prej 179 000 000 (njëqind e shtatëdhjetë e nëntë milionë) lekësh.
2. Ngarkohen Ministria e Financave dhe Ekonomisë, Ministria e Infrastrukturës dhe Energjisë dhe Agjencia Kombëtare e Ujësjellës-Kanalizimeve dhe Infrastrukturës së Mbetjeve për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
