Ministri i Punëve të Jashtme i Shqipërisë, Gent Cakaj, ka kërkuar nga Presidenca gjermane e BE-së që të ushtrojë ndikimin e saj për heqjen e vizave për qytetarët e Kosovës.
Ai sot gjatë një takimit në Berlin me kryetarin e Komisionit për Çështje Evropiane të Bundestagut, Gunther Krichbaum, ka thënë se procesi i dialogut mes Kosovës dhe Serbisë duhet të përfundojë me njohje reciproke.
“Sot në Berlin, pata një takim të shkëlqyer me Kryetarin e Komisionit për Çështjet Evropiane të Bundestagut, z. Gunther Krichbaum.
E informova hollësisht mbi përparimin e Shqipërisë në përmbushjen e detyrimeve të nevojshme para mbajtjes së Konferencës së Parë ndër-Qeveritare, duke përfshirë reformën zgjedhore, luftën kundër krimit të organizuar dhe korrupsionit, deri te ngritja e SPAK-ut dhe BKH-së.
Ndamë të njëjtën pikëpamje lidhur me rëndësinë e zgjerimit të Bashkimit Evropian në Ballkanin Perëndimor.
Po, patjetër: theksova se Presidenca Gjermane e Këshillit duhet t’i japë shtysë të fortë procesit të liberalizimit të vizave për Kosovën dhe se dialogu mes Kosovës e Serbisë nuk duhet të përfundojë me asgjë më pak se njohja e ndërsjellë …”, shkruan Cakaj.
Ndërkohë nga një foto, duket se parlamentari Krichbaun i ka dhuruar Cakajt edhe një kukull, e cila duket se e ka kënaqur shumë ministrin në detyrë të Punëve të Jashtme të Shqipërisë.
Krichbaun, është një nga politikanët gjermanë më kritikë ndaj Kryeministrit Edi Rama. Kritikave të tij i është përgjigjur edhe Rama, i cili e ka konsideruar të painformuar.
“kam takuar kryeministrin e Shqipërisë, Edi Rama, në Bundestagun e Gjermanisë. Me këtë rast, personalisht i thashë atij se unë mendoj se hapja e bisedimeve të pranimit të Shqipërisë me BE është e parakohshme në këtë fazë. Reforma e mëparshme ende nuk janë të mjaftueshme”, shprehej Krichbaum, pas një takimi të zhvilluar me Ramën, rreth dy vjet më parë.
