Gjatë debatit për arsimin e lartë në Kuvend, deputetja demokrate Jozefina Topalli ka replikuar me kryeministrin Rama, duke iu drejtuar se nuk dha shifra për pranimin e maturantëve në shkolla.
Mes të tjerash, Topalli tha se Rama e ka vulgarizuar Parlamentin me gjuhën e tij dhe se po të ishte për të, do të sillte njerëzit e saj para kryeministrisë për ta rrëzuar nga pushteti.
“Nëse kryeministri ka një meritë gjatë kësaj periudhe, është shkatërrimi, banalizimi, vulgarizimi i Parlamentit për të tërhequr vëmendjen nga dështimet e tij të njëpasnjëshme. Unë nuk e di sa kolegët e mi ndjekin parlamentet e tjera, apo transkriptin e fjalimeve të kryeministrave të vendeve të tjera qoftë edhe këtu përreth, – tha deputetja demokrate. – Më thoni nëse gjeni qoftë edhe një kryeministër që të dalë në foltoren e Kuvendit dhe të përdorë një gjuhë aq vulgare, aq llumë sa ky që ka emrin kryeministër sot. Unë turpërohem sepse je kryeministri i vendit tim”, tha Topalli.
Sakaq ish-kryeparlamentarja shtoi se “sigurisht po të ishte për mu, do të kisha sjellë njerëzit para kryeministrisë për të të rrëzuar, jo për vulgaritetin tënd, por për mos përgjegjësinë totale në çdo fushë, në ekonomi, në politikën e jashtme, në drejtësi, në cinizmin, në sadizmin që përdor kush sheh se çdo gjë shkon keq në këtë vend”.
Duke u kthyer te pranimi në universitete, Topalli shtoi se Rama ka mbajtur në ankth studentët gjatë muajve të fundit: “Fole për arsimin. Përsëri gënjeve siç e bën gjithmonë. Fole për shifra dhe më ngjasonin me ato shifra që jep ti dhe ministri jot që thoni se 99% e kanabisit është zhdukur nga ky vend. Të thuash se është tallje…të thuash se je i çmendur… Problemi është se nëse në Romë universiteti ka një muaj që ka filluar, këtu ende nuk janë hapur. Vendet bosh janë jo për atë arsye që gënjeve ti, por vendet bosh janë pasi ke mbajtur studentët në ankth, pasi i ke futur në panikun se ata nuk kanë drejtë, kanë mbushur dhe janë turrur në universitetet private që të shërbejnë ty si zvarranikë”.
