Një aksident tragjik ka ndodhur mbrëmë në Varedo-Itali, në rrugën Monza-Sarono, ku ka humbur jetën një shtetas shqiptar, 26 vjeç, rezident në provincën e Milanos.
Shqiptari ishte në drejtimin e një makine “Ford Focus”, e cila befas kaloi në korsinë tjetër, ku në atë moment po kalonte një Opel Corsa, e drejtuar nga një 51-vjeçar.
Pas përplasjes, Opeli përfundoi në hendekun anës rrugës dhe ngeci sipër Fordit. Në vendngjarje mbërritën dy ambulanca bashkë me karabinierët, të cilët nxorën nga makina 26-vjeçarin që ishte në gjendje shumë të rëndë.
Mjekët nisën përpjekjet për t’i shpëtuar jetën shqiptarit që ndërkohë kishte pësuar arrest kardiak.
Ai vdiq pak më vonë, në urgjencën e spitalit San Gerardo në Monza, ndërsa italiani në drejtimin e Opelit ka marrë plagë në qafë e gjoks, por nuk duket në rrezik për jetën.
