Një 26-vjeçare ka kallëzuar në polici ish-të dashurin e saj. Sipas vajzës, ai e ka dhunuar si dhe ka kryer marrëdhënie intime me të pa dëshirën e saj.
Pas kallëzimit të së resë, policia ka shpallur në kërkim autorin e dyshuar.
“U referuan materialet dhe punohet për kapjen e shtetasit të shpallur në kërkim J.C., 26 vjeç, sepse në mënyrë të përsëritur ka ushtruar dhunë fizike dhe psikologjike ndaj të dashurës së tij, si dhe ka kryer marrëdhënie seksuale me të, pa dëshirën e saj”, njoftoi policia.
Të njëjtat burime shtuan se vajzës iu plotësua kërkesë-padia për lëshimin e menjëhershëm të urdhrit të mbrojtjes.
Numri i krimeve seksuale në vend ka ardhur në rritje gjatë tre viteve të fundit. Referuar të dhënave zyrtare të Prokurorisë së Përgjithshme, nga viti 2017, në vitin 2018, numri i procedimeve penale për krime seksuale është rritur me 10.7 për qind. Ndërsa një vit më vonë, në 2019 rritja e numrit të hetimeve të nisura për krime seksuale është gati 40 për qind. Në raportin vjetor të gjendjes së kriminalitetit për vitin e kaluar thuhet se janë regjistruar në total 158 çështje për krime me natyrë seksuale, nga të cilat 49 persona kanë përfunduar të dënuar me vendim gjyqësor.
