Kampionati italian i futbollit, Serie A starton sot sezonin 2020/2021, teksa ndeshja hapëse do të jetë mes Fiorentinës dhe Torinos në stadiumin “Artemio Franchi” të Firenzes.
Skuadra vjollcë është përforcuar ndjeshëm veçanërisht në repartin e mesfushës dhe synon që të rikthehet në kupat e Europës këtë sezon, të cilin do të kërkojë ta nisë në mënyrën më të mirë të mundshme ndaj Torinos.
Edhe skuadra “granata” ka ndryshuar ndjeshëm krahasuar me sezonin e kaluar, pasi në pankinë është ulur Marco Giampaolo, i cili ka ndryshuar skemën dhe do të provojë të sjellë një futboll të bukur e argëtues, por mbi të gjitha rezultativ.
Në mbrëmje do të luhet ndeshja e dytë e javës, ku në “Bentegodi” do të vihen përballë Verona vendase dhe Roma. Të dy klubet vetëm pak ditë më parë ishin në tryezën e bisedimeve, ku kompletuan me sukses transferimin e mbrojtësit Marash Kumbulla te verdhekuqtë, por 20-vjeçari shqiptar nuk pritet të jetë në dispozicion të trajnerit Fonseca mbrëmjen e sotme.
Ndërkohë vlen të theksohet se ditën e djeshme në Itali u vendos që në të gjithë sportet në ambient të hapur, të lejohet prania e një numri maksimal prej 1000 tifozësh dhe gjithçka do të nisë këtë javë të parë por fillimisht vetëm me stadiumet e rajonit të Emiglia-Romagnas, konkretisht në ndeshjet e Parmës dhe Sassuolos.
