Largimi i Gareth Bale nga Real Madrid do të thotë që numri ikonik 11 do të jetë i lirë te “Los Blancos”.
Këtë numër që nga viti 2013 e mbante veshur anësori uellsian, ndërsa tashmë pritet të trashëgohet nga një midis Asensio dhe Vinicius Jr.
Asensio gjithmonë ka dashur të veshë numrin 10, por tashmë ai po konsideron idenë e mbajtjes së numrit 11 në shpinë për shkak se numrin e tij të preferuar në skuadër e mban Luka Modric.
Është një numër që do t’i shkonte mirë, por ai nuk ka marrë ndonjë vendim të prerë dhe nuk do të komentojë ndërsa Bale është ende një lojtar i Real Madrid .
Vinicius gjithashtu do t’i shkonte për shtat, pasi e ka veshur më parë këtë numër te Flamengo. Por te Real Madrid atij iu desh të vishte nr.28 dhe atë 25.
Nëse ai nuk do të trashëgojë numrin e Bale , ai do të duhet të vazhdojë me numrin e tij 25 ose numrin 16 të James Rodriguez .
Kujtojmë që Gareth Bale flitet për një rikthim te Tottenham, teksa gjithçka pritet të zyrtarizohet në ditët në vijim.
