Një tjetër episod dhune në botën e futbollit, por historia e kësaj here, që mbërrin nga Spanja, është unike, për shkak të dhunuesit dhe viktimës.
Autorja e agresionit është gjyshja e njërit prej futbollistëve në fushë, ndërsa viktima e saj është një arbitër që sapo ka mbushur 18 vjeç.
Episodi i denoncuar nga vetë Ivaro de la Iglesia, për gazetën “Marca” ka ndodhur në përfundim të një ndeshje të vlefshme për Divizionin e parë provincial të kadetëve mes, Puente Castro dhe Peña.
“Pas vërshëllimës përfundimtare një zonjë rreth të gjashtëdhjetave më preu rrugën, më pas më kapi nga krahu, më gërvishti, më pas tentoi të më qëllonte me katër apo pesë shuplaka, duke më goditur dy herë në krah dhe në gjoks”, tregon gjyqtari, viktimë e sulmit të rrallë.
Arsyeja e incidentit mësohet të jetë ndëshkimi me karton të kuq i një prej futbollistëve të ekipit vendas.
Gruaja që ka dhunuar gjyqtarin e takimit dhe që gjatë ndeshjes e kishte dendur atë me ofendime, mesa duket ishte gjyshja e portierit të formacionit vendas dhe tashmë është denoncuar, sipas parashikimeve në rregulloret dhe aktet ligjore në fuqi.
