Të paktën 4 diplomatë i janë përgjigjur ftesës së kreut demokrat Lulzim Basha, për të diskutuar me të zhvillimet politike në vend, veçanërisht reformën zgjedhore, pas ndryshimeve Kushtetuese të miratuara në mënyrë të njëanshme nga Partia Socialiste.
Nga raportimet mësohet se në takim ndodhet Ambasadori i BE-së, Luigi Soreca, ai i Britanisë së Madhe, Duncan Norman, zv.ambasadorja emariken Moses Ones, si dhe një përfaqësues nga Ambasada gjermane.
Mësohet se në takim do të diskutohen çështje që lidhen me Këshillin Politik, ku pritet të diskutohen ndryshimet në Kodin Zgjedhor, pas ndryshimeve Kushtetuese.
Në këtë takim do të jenë edhe anëtarët e opozitës në Këshillin Politik, Oerd Bylykbashi dhe Petrit Vasili.
Gjatë takimit opozita e bashkuar ka paraqitur shqetësimin e saj lidhur me koalicionet, por edhe denoncimet e kryera së fundmi, për angazhimin e drejtuesve të institucioneve në fushatë.
Ambasadorët, i kanë nxitur kryesisht palët për të sheshuar përplasjet e tyre politike.
PD dhe LSI, përmes përfaqësuesve të tyre në Këshillin Politik, i kanë kërkuar mazhorancës që t’i drejtohen me një kërkesë për një ekspertizë të thelluar ODIHR sa i takon koalicioneve parazgjedhore.
Një ditë më parë, Damian Gjiknuri, përfaqësues i PS në Këshillin Politik, i ka lënë afat deri të premten opozitës të paraqesë propozimet e saj lidhur me listat e kandidatëve, ku sipas Rilindjes, në rastin e koalicioneve partitë garojnë me një listë të përbashkët. Gjithashtu u është kërkuar propozimi lidhur me pragun elektoral kombëtar, si dhe mënyra e llogaritjes së votave për listat e hapura, duke ruajtur kuotat gjinore.
