Përditësuar/ Pas 4 orë konfrontimesh me uniformat blu ka përfunduar protesta e naftëtarëve të Ballshit me zotimin për tu rikthyer sërish nesër së bashku me familjarët e tyre përpara rafinerisë.
“Besoj se protesta e sotme i dha mesazh të qartë atyre që e kanë marrë përsipër të jenë në një rrugë të gabuar. Po u jepet një mundësi sot të reflektojnë përmes Ministrit dhe Ministres. U bëj thirrje kolegëvëe ditën e nesërme në orën 8 të gjithë naftëtarët me fëmijët përdore, qytetarët e Ballshit, Patosit dhe Fierit, do të bojkotojmë dhe shkollën. Nuk ka jetë pa rafineri. Nëse do të përdorin gaz lotsjellës kundër fëmijëvë tanë, le ta mbajnë përgjegjësinë vet. Të gjithë qytetarët të jenë para portës së rafinerisë”, bëri thirrje kreu i Sindikatës, Sokol Dautaj.
***
Ora 11:57- Policia helmon naftëtarët me spraj, rreth 10 protestues përfundojnë në spital
Spraji i hedhur nga policia gjatë protestës së naftëtarëve në Ballsh ka sjellë probleme shëndetësore për disa prej protestuesve.
Mësohet se rreth 10 persona janë paraqitur në spital me shenja helmimi dhe po marrin ndihmë mjekësore.
***
Ora 11:20 – Përshkallëzohet protesta e naftëtarëve në Ballsh/ Policia hedh spraj, humb ndjenjat një protestues (VIDEO)
Vijojnë tensionet në uzinën e Ballshit.
Policia ka hedhur spraj djegës për shpërndarjen e naftëtarëve, pasi këta të fundit kanë çarë kordonin e efektivëve. Ndërkohë, njëri nga protestuesit ka humbur ndjenjat.
Ashtu siç paralajmëruan tre ditë më parë, naftëtarët e Ballshit kanë vijuar me përshkallëzimin e protestës këtë të hënë. Kërkesat e tyre mbeten të njëjta.Tu shlyejnë detyrimet e prapambetura dhe pastaj të mbyllin rafinerinë, ose të nisë puna në uzinë por me kontratë. Naftëtarët kishin arritur një dakordësi me kompaninë Allum Enterprises për rifillimin e punës, por ata thonë se u kanë dhënë vetëm një letër pa firmë e vulë.
Kjo fundjavë ishte afati për nënshkrimin e kontratave dhe kalimin e një page, por sipas tyre premtimi nuk u mbajt ndaj nisën protestat.
Rafineria në Ballsh ndërpreu punën vjeshtën e kaluar, pasi shoqëria që e administronte në atë kohë u akuzoi Bankers Petrolium se nuk e furnizonte me naftë bruto. Prej asaj kohe naftëtarët mbeten pa punë dhe në vazhdimësi kanë protestuar dhe zhvilluan një grevë urie për pagat e prapambetura dhe rinisjen e punës.
