Të paktën 10 mësues të shkollës 9-vjeçare “Jeronim De Rada” dyshohet se janë prekur nga Covid-19. Lajmi është bërë publik nga mësuesja Brunilda Cerraga.
Ajo tha se kolegët e saj u konfirmuan dje me koronavirus, ndërkohë që ishin bashkarisht në mjediset e shkollës, pasi ishin urdhëruar për të qenë pjesëmarrës në mjediset e shkollës, e cila u inaugurua sot nga Kryebashkiaku rion Veliaj dhe deputetë të PS-së.
“Është një situatë e rëndë, nuk e dimë se çfarë do të bëhet, ndërkohë që janë 10 mësues që janë të infektuar. Ne nuk e dimë se sa mund të jetë shtuar numri, ndërkohë që kemi qenë këto ditë bashkarisht.
Të enjten i gjithë stafi i është nënshtruar tamponit, përgjigjet kanë dalë dje, ndërkohë që të premten dhe të shtunën kemi qenë bashkarisht në të njëjtat mjedise”, tha ajo në një lidhje për abcnews.
Denoncimi i mësueses Cerraga ka ardhur në një kohë kur Veliaj po inauguronte mjediset e shkollës dhe hidhte akuza ndaj Presidentit të Republikës.
Shkolla Jeronim De Rada ka gjithsej 46 mësues, nga të cilët 10 rezultojnë me Covid. Mësohet se arsimtarët e infektuar dhe familjarë të tyre tashmë janë karantinuar në banesat e tyre.
