Partia Socialiste ka zgjedhur të njëjtën strategji si në Dibër edhe për zgjedhjet për Bashkinë e Kolonjës.
Në këtë mënyrë, mazhoranca ka zgjedhur një mjek për të kandiduar në Bashkinë e Kolonjës kundër kandidatit të së djathtës, Dritan Hajro.
Në përfundim të mbledhjes së grupit parlamentar socialist, deputeti Pandeli Majko ka bërë të ditur për mediat se cili është personi i përzgjedhur.
“U diskutua për zgjedhjet për Bashkinë e Kolonjës. Ne mendojmë se kandidati që kemi zgjedhur, kirurgu Ilia Stefa, ka dhënë prova në shërbim të qytetarëve dhe shërbimin si mjek do ta kalojë në shërbim menaxherial. Ne jemi të bindur se kjo është zgjedhja e duhur, ndaj në këtë mbledhje kemi miratuar kandidaturën e tij”, tha Majko.
Stefa do të kandidojë kundër Dritan Hajros. Ky i fundit është kandidat i propozuar nga Partia Agrare Ambientaliste dhe i mbështetur nga Partia Demokratike.
