Qytetarët e Tiranës duhet të përballen çdo ditë me një trafik të ‘çmendur’, ku sikur të mos mjaftonte numri i lartë i makinave, janë shtuar edhe betonieret, të cilat kanë pushtuar të gjitha rrugët e kryeqytetit.
Në çdo orë të ditës apo të natës dhe në çdo cep të Tiranës sheh betoniere, të cilat bllokojnë jo vetëm rrugët duke krijuar trafik, por edhe trotuaret, pasi parkohen para ndërtesave gjigante që po ndërtohen në Tiranë me leje të Erjon Velisë.
Por ajo që të bënë më shumë përshtypje në të gjithë këtë rrëmujë të madhe, betonieret lëvizin lirshëm në mes të ditës si dhe bllokojnë rrugë, ndërkohë që policia rrugore e drejtuar nga Erion Ahmeti i mbyll të dy sytë dhe nuk i gjobit.
Siç shihet edhe në fotot e mëposhtme të bëra publike nga gazetarja Lindita Çela, betonieret në Tiranë qarkullojnë pa pikë problemi dhe pa pyetur fare për ligje apo rregulla, pasi mesa duket policia e Erion Ahmetit në vend që t’i gjobisë për shkelje të kodit rrugor (Kujtojmë që mjetet e tonazhit të rëndë nuk lejohet të lëvizin gjatë ditës në qendrat urbane’, i ruan ato që mos i prekë askush.
Boldnews.al, prej disa muajsh bën publike denoncimet dhe ankesat e qytetarëve lidhur me betonierët, të cilët e shohin qarkullimin e tyre nëpër Tiranë si një problem shumë të madh për krijimin e trafikut, por dhe për bllokimin e trotuareve.
Por pavarësisht denoncimeve të qytetarëve dhe publikimeve të Boldnews.al, policia rrugore e drejtuar nga Erion Ahmeti nuk e ka vënë ‘ujin në zjarr’.
Arsyet e verbërisë së policisë ndaj betoniereve duhet t’i shpjegojë shefi i qarkullimit të Tiranës, Erion Ahmeti, Drejtori i SHÇBA Muhamet Rrumbullaku dhe Drejtori i Përgjithshëm i Policisë Ardi Veliu.
