Një 37-vjeçar, me detyre inspektor në Drejtorinë e Përgjithshme e Tatimeve, që ndodhet në Tiranë, është vënë në pranga për veprën penale “Korrupsioni pasiv i personave që ushtrojnë funksione publike”.
“Seksioni për Hetimin e Korrupsionit në Drejtorinë Vendore të Policisë Tiranë, nën drejtimin e Prokurorisë së Posaçme Kundër Korrupsionit dhe Krimit të Organizuar Tiranë, finalizoi operacionin policor të koduar ‘Tatimori’, në kuadër të të cilit u arrestua shtetasi: Erjon Trungu, 37 vjeç, me detyrë inspektor në Drejtorinë e Hetimit Tatimor në Drejtorinë e Përgjithshme e Tatimeve”, njoftoi këtë të Enjte, Policia e kryeqytetit.
Hetimet
Nga hetimet e kryera ka rezultuar se ky shtetas iu kërkonte dhe iu merrte shuma të konsiderueshme monetare subjekteve të ndryshme private, si këmbim për të mos i hetuar dhe mos i referuar në prokurori, kur këto subjekte konstatoheshin në shkelje.
Në cilësinë e provës materiale u sekuestrua shuma monetare prej 5 000 eurosh, të cilën ia kishte marrë administratorit të një subjekti privat.
“Vijon puna për dokumentimin ligjor të plotë të kësaj veprimtarie kriminale dhe për identifikimin e personave të tjerë të përfshirë në këtë veprimtari korruptive, njoftoi policia, ndërsa materialet procedurale i kaluan Prokurorisë së Posaçme Kundër Korrupsionit dhe Krimit të Organizuar Tiranë, për veprime të mëtejshme hetimore”.
