Kryeministri Edi Rama ka bërë një tjetër premtim, rritjen e pagave të mësuesve. E ndërsa pak ditë më parë premtoi rritjen e pagave për mjekët, por ende nuk ka ndonjë vendim Qeverie për këtë kategori, sot Rama ka premtuar edhe për mësuesit.
“Për mjekët dhe për mësuesit duhet të bëjmë një sforco të madhe. Kështu që shumë shpejt ne do të konkludojmë lidhur me këtë dhe nga ana tjetër jemi duke menduar një sistem të vlerësimit të meritës së mësuesve gjë që po e analizojmë dhe me shumë gjasë nga sezoni i ardhshëm shkollor do të mund të jemi gati të themi si do të funksionojë ky sistem, ku mësuesit më të mirë do të duhet të vlerësohen edhe financiarisht ndryshe. Kjo do të bëjë që mësuesit më të mirë të vlerësohen dhe nga ana tjetër konkurrenca të motivohet më shumë”, tha Rama.
Por sipas tij, mësuesit që kanë dhënë mësimet online meritojnë shumë më shumë.
“Sidoqoftë për të gjithë mësuesit ne duam që të bëjmë ashtu si dhe për mjekët një rritje të re të pagave dhe besoj që kjo do të bëhet shumë shpejt me buxhetin e ri dhe besoj se është më shumë sesa e merituar për të gjithë në tërësi.
Ndërsa për ju në veçanti meritoni shumë më shumë se kaq dhe do mundohemi të bëjmë më shumë sesa për tërësinë”, tha kryeministri Edi Rama.
