Mesfushori i Sevillas, Ivan Rakitic, tashmë ka nisur të mendojë për ekipin e ri. Ish-mesfushori i Barcelonës në një intervistë për faqen zyrtare të klubit tregon më shumë rreth objektivave sezonal si dhe nuk nguron t’i bëjë një ftesë ish-shokut të ekipit, Lionel Messi.
“E ardhmja e Messit? Besoj se mund t’i bëjmë një vend këtu te Sevilla. Jo sinqerisht më pëlqen se si klubi është rritur. Unë dua të punoj dhe të luftoj me shokët e mi të skuadrës për ta bërë këtë klub akoma më të madh. Dhe këtë gjë unë dua ta bëj që tani,” deklaron kroati.
“Superkupa kundër Bayernit? Shumë respekt për ta. Mendoj se është një ndeshje e vështirë dhe ne e dimë shumë mirë se sa të fortë që janë ata. Por unë besoj shumë dhe tek forca që Sevilla ka. Në lojë është një trofe i rëndësishëm dhe ne duhet të përgatitemi sa më mirë për këtë sfidë. Duam të tregojmë se jemi një ekip i mirë. Hakmarrje apo jo, ajo çka unë dua është vetëm të fitoj me Sevillan dhe mezi po pres,” mbyll mesfushori. /abcnews.al
