Pas disa javësh hetimesh policia e Sarandës ka arritur të zbardhë vrasjen e vëllait të ish-kryekomunarit të Kacinarit, Aleksandër Bardhit, ngjarje e ndodhur më 24 Shtator të këtij viti në fshatin Shëndëlli.
Sipas policisë, autorë të kësaj vrasjeje janë Dhimitër Ciko, 20 – vjeç, i dënuar më parë për “Trafikim Narkotikësh”, A.L., 18 – vjeç, ndërsa në kërkim është shpallur 20 – vjeçari A.Xh., i dënuar më parë për “vjedhje”, të gjithë banues në Ksamil.
Gjatë kontrollit të ushtruar në banesën e 20 – vjeçarit A.Xh., policia gjeti 3 armë zjarri “Automatik-model 56” si dhe 3 krëhëra të mbushur me fishekë, të cilat u dërguan për ekzaminime laboratorike, ku rezultoi se të tre armët e mësipërme kanë realizuar qitje në vendin e ngjarjes për vrasjen e Aleksandër Bardhit.
Gjithashtu, Policia bën me dije se këta persona janë autorë në lidhje me një ngjarje tjetër të ndodhur në datën 21 Shtator, ku në vendin e quajtur “Kthesa e shëtitorës” Ksamil, është qëlluar me armë zjarri në ajër, ngjarje për të cilën grupi hetimor ka gjetur dhe sekuestruar në cilësinë e provës materiale 6-gëzhoja automatiku model 56, të kalibrit 7.62 mm.
Si rezultat i ekzaminimeve të kryera për 3 armët e mësipërme për vrasjen e Aleksandër Bardhit, ka rezultuar se 1 prej tyre është përdorur në këtë ngjarje të Ksamilit.
Aktualisht policia vijon punën për kapjen e 20 -vjeçarit në kërkim.
Aleksandër Bardhi, 47 – vjeç, babai i dy fëmijëve u ekzekutua mbrëmjen e së shtunës më 24 Shtator në Fshatin Shëndëlli të Sarandës.
