Nga Artur Zheji
Rilindasit flasin bukur. Ministri Tahiri, ministri Bushati, janë, kur i dëgjon oratorë shumë të mirë dhe të talentuar, madje dëgjohen me ëndje se ndërtojnë sintaksën e retorikës së tyre komunikative.
Aeroplani më i fundit i Gjirit të Lalëzit, kaloi tanimë si një jo lajm. Aeroplani nuk flet me fjalë, por është goditës me figurë. Ishte bosh apo plot askush nuk e di. Por nga të dhënat që disponohen, dihet se nuk është vetëm fusha, pista apo aeroporti i vogël i Ishmit, por edhe të paktën ka, edhe disa pista të tjera.
Tanimë është e qartë. Çështja e Kanabisit, nuk është ashtu si thotë Opozita, vetëm një Çështje Kriminale apo një mungesë kontrolli të territorit, por gjithmonë e më shumë, kemi të bëjmë me një politikë të mirëfilltë kanabiste.
Çfarë do të thotë kjo? Kemi të bëjmë me një strategji të mirëfilltë anti-Krizë, mbështetur të të ardhurat që do të krijohen te korrja, magazinimi dhe te shitja e këtij prodhimi, që do të sigurojë sipas përllogaritjeve, të ardhurava të mjaftueshme, për shmangur tragjedinë ekonomike që po shkakton situata ekonomike e rënduar.
Nuk jam dakort se kemi të bëjmë me përllogaritje vetëm korruptive të segmenteve të caktuara të qeverisjes, por kemi të bëjmë me një strategji të qëllimshme, për të siguruar të ardhura ekonomike, duke thirrur në ndihmë këtë rrugë kriminale.
Iluzioni që kjo zgjidhje, është sot dhe do të jetë edhe nesër një proces i kontrollueshëm, nga lart-poshtë, është thjesht një aventurë e rrezikshme dhe mendjelehte njëkohësisht. Skenari që po ndërtohet shkallë shkallë, është pak të themi dramatik. Situata do të dalë shumë shpejt nga kontrolli dhe menaxherët-kriminelë, nga të ngarkuar të përkohshëm për një strategji anti-krizë, do të formatojnë një kastë që do të prodhojë edhe biznes legal edhe politikanët e vet dhe pse jo, edhe partitë e veta të mirëfillta politike.
Shumë shpejt, ashtu si edhe ndodhi në Peshkopi, kasta e kanabisit dhe karteleve të drogave të rënda, nga vegla të thirrura për një ndihmë politike, do të shndrrohen në kasta dhe kartele, që do të vendosin sipas skemës së mësuar në terren nga padronët e sotëm, kandidatët e tyre. Dhe ky është një rrezik i prekshëm dhe aktual.
Dhe ngjan me gjarpërin që kafshon bishtin e vet. Pra do të jemi shumë shpejt, ose jemi dhe nuk e dimë, në prag të një vetëvrasjeje të mirëfilltë shoqërore.
Dhe për të çrënjosur këtë të Keqe, që është gjetur si një zgjidhje ekstreme e vtëdijshme, përkundrejt katastrofës ekonomike, që nuk është vetëm përgjegjësi e kësaj qeverie, do të jetë jetë një katastrofë edhe më e madhe.
Në pamundësi të ndihmës ekonomike, iluzioni se përmes kanabisit, do të mbrrihet zbutja e varfërisë, është vrasës. Plus kësaj, strategjia që përmes kësaj zbutjeje të varfërisë dhe premtimit që po të votojnë përsëri majtas, do të lejohen dhe do të mbrrohen në mbjelljet e reja, është një synim ambicioz, që ka si pikësynim, përjetësimin e pushtetit të një grupi të vogël politik.
Skenar ky, që shënon një dështim të rrezikshëm, në brendësi të një dështimi ekonomik, gërshetuar me pikësynime të mirëfillta politike. Dhe të gjitha këto, janë të dhënat bazë, që themelojnë një Kastë Politike me prapaskenë bandat që kqyrin dhe menaxhojnë biznesin e drogës.
Bandat të cilat, janë duke krijuar me shpejtësi inteligjencën e vet dhe strukturat paralele të anti-shtetit, po kacavirren drejt majave të tij.
Dhe nesër, në mos që sot, këto struktura të Anti-shtetit që ushqehen me tregëtinë e vdekjes, do ti përplasin në tavolinë grushtin, ministrave dhe kryeministrave që do të vinë. Duke u shndërruar nga vegla të sistemit, në komandues të sistemit, që i punësoi si mbroklla shpëtimtare të krizës ekonomike.
Dhe ky është gjarpëri që kafshon bishtin e vet./360grade.al
