Aleanca Kundër Importit të Plehrave (AKIP) përshëndeti vendimin e Presidentit Nishani për të kthyer për rishqyrtim në Kuvendin ligjin për “Mbetjet”.
Përfaqësues të AKIP i kërkuan mazhorancës që të reflektojë pas këtij momenti, duke theksuar dhe njëherë tjetër se mbetjet e importuara jo vetëm do ndotin vendin, por njëherazi rrezikojnë edhe shëndetin e qytetarëve.
“Ne do presim një moment qetësie që qeveritarët të reflektojnë ashtu siç kërkoi presidenti sot, por nuk do ta lemë në asnjë moment që qeveria mos ndjejë trysninë e qytetarëve. Shqipëria është e jona dhe të gjithë bashkë mund ta bëjmë realitet që Shqipëria të mbetet pa plehra të importuara”, u shprehën përfaqësues të AKIP.
AKIP fton qytetarët që të jenë gati në rast se mazhoranca nuk reflekton ndryshimet në ligj.
“I bëjmë thirrje shqiptarëve të jemi gati se nuk e dimë çfarë na pret. Në çdo rast mund të kemi zhvillime që mund të mos na pëlqejnë”, thanë ata.
