61-vjeçari Dorian Latollari është vrarë me sende të forta në Tiranë, ndërsa autori i krimit është prangosur. I arrestuari është 37-vjeçari Fatmir Demiri, ish ushtarak, i dënuar më parë për Dezertim nga shërbimi Ushtarak.
Dyshohet se autori dhe viktima kishin konflikte pronësie.
Ngjarja
Ishte një telefonatë që vuri në lëvizje policinë, që njoftonte se në rrugën “Haxhi Hysen Dalliu”, në oborrin e banesës së tij, 61-vjeçari ishte gjetur pa shenja jete.
Specialistët për Hetimin e Krimit në Komisariatin e Policisë Nr.3, nën drejtimin e Prokurorisë, arrestuan autorin e dyshuar, Fatmir Demiri, banues në Tiranë.
Burime zyrtare nga policia bënë me dije se “37-vjeçari e ka pranuar autorësinë dhe është shprehur se për disa konflikte të mëparshme, (dyshohet për konflikte pronësie), me vetëpërgjegjësi ka goditur me sende të forta duke i shkaktuar vdekjen Dorian Latollarit”.
Materialet do t’i referohen Prokurorisë së Rrethit Gjyqësor Tiranë, për veprime të mëtejshme hetimore, shtuan të njëjtat burime.
