Presidenti Meta i ka bërë thirrje shqiptarëve në Malin e Zi që të votojnë për partitë shqiptare në zgjedhjet e 30 gushtit.
Përmes një videomesazhi, Meta shprehet se zgjedhjet e 30 gushtit janë një mundësi e shkëlqyer për të forcuar perspektivën europiane të vendit, por dhe për të shtuar përfaqësimin e shqiptarëve në parlament:
“Shpreh bindjen se bashkëkombasit tanë në Malin e Zi, do ta shfrytëzojnë këtë mundësi historike përmes pjesëmarrjes së gjerë, por njëkohësisht përmes mbështetjes së tyre për alternativat shqiptare, në mënyrë që përfaqësimi i tyre në Parlamentin e Malit të Zi të rritet, si dhe në të gjitha institucionet e ardhshme qeverisëse.”
Partitë shqiptare në Mal të Zi garojnë në zgjedhjet e 30 gushtit me një listë të përbashkët, me qëllim maksimizimin e votave.
Më herët dhe Zëvendës ministri i Jashtëm, Gent Cakaj i bëri thirrje të gjithë shqiptarëve në Mal të Zi, të mbështesin listën shqiptare.
Ndërsa kryeministri Rama ka shprehur publikisht mbështetjen për Milo Gjukanoviçin, drejtues i Malit të Zi, prej vitit 1991.
