Regjisorja e njohur në Afganistan, Saba Sahar është qëlluar me armë, raporton BBC. 44-vjeçarja u dërgua në spital menjëherë pas ngjarjes.
Bashkëshorti i saj, Emal Zaki tha për BBC se ajo po udhëtonte për punë në kryeqytet, Kabul, kur një person i armatosur hapi zjarr mbi makinën e saj.
Dy truprojat e saj gjithashtu u qëlluan me armë dhe u plagosën, rrëfeu ai.
Makina e saj u qëllua në perëndim të Kabulit. Brenda automjetit ishin pesë persona, Sahar, dy truprojat, një fëmijë dhe shoferi. Fëmija dhe shoferi nuk u lëndua nga të shtënat me armë.
Zaki tha se dëgjoi të shtënat me armë rreth pesë minuta pasi gruaja e tij u largua nga shtëpia. Ai tha kur shkoi në vendngjarje gruaja i tregoi se ishte qëlluar në stomak.
“Kur mbërrita në vendin e ngjarjes, i gjeta të plagosur,”– u shpreh ai. “Ajo mori ndihmën e parë dhe e dërguam në urgjencë.”
Ndërsa tregoi se aktorja iu nënshtrua një operacioni që rezultoi i suksesshëm.
Sahar është ndër aktoret më të famshme në Afganistan. Gjithashtu ajo është regjisore e njohur dhe bën fushatë për të drejtat e grave.
Aktorja është trajnuar si oficere policie dhe punon për Ministrinë e Brendshme. Ndërsa programet e saj televizive janë të fokusuara tek drejtësia dhe korrupsioni në vend.
