Kryetari i forumit rinor të PD-së, Belind Këlliçi, ka thënë se kryeministri Rama po mashtron sërish shqiptarët.
Përmes një postimi në rrjetet sociale, Këlliçi ka sulmuar Ramën duke thënë se ka vjedhur dhe abuzuar me 6 miliardë euro, para të taksapaguesve shqiptarë.
Sipas tij, kryeministri Rama nuk ka bërë asnjë investim të rëndësishëm për vendin, përveç se ka dëbuar 300 mijë shqiptarë nga vendi.
“Në 7 vite Lukashenko i Shqipërisë ka vjedhur dhe abuzuar me 6 MILIARDË euro para të taksapaguesve shqiptarë!
Në 7 vite ka rritur borxhin, duke detyruar çdo shqiptar të paguajë 4492 euro!
Edi Rama nuk ka bërë asnjë investim të rëndësishëm për vendin. As rrugë, as spitale dhe as shkolla. Ka dëbuar nga vendi mbi 300 mijë shqiptarë. E sot vazhdon sërish me avazin e vjetër se tërë këto vite, qeveria e tij po paguante borxhet.
Edi Rama po bën gjithçka për të mashtruar sërish shqiptarët, të cilët i ka lënë të vetëm përballë krizës shëndetësore dhe ekonomike që ka rrenuar mbi 90% të familjeve shqiptare.
Edi Rama nuk ka bërë asgjë këto vite, sepse paratë i ka bashkëndarë me tendera e konçesione korruptive. Prandaj vendi po shkon keq e më keq e shqiptarët çdo ditë e më shumë po largohen si azilantë në vendet e BE dhe mbarë globit.
Edi Rama ka vetëm një shërbim për tu bërë shqiptarëve, të pranojë verdiktin e qytetarëve dhe të mos mundohet më t’i trajtojë si dele që të mund t’i gënjejë kur dhe si të dojë, siç i ka trajtuar deri më tani. Shqipëria dhe shqiptarët meritojnë zhvillim dhe punësim dhe kjo do të vijë vetëm përmes një qeverie që punon për ta dhe jo për një grusht oligarkësh si në këto 7 vite”, shkruan Këlliçi.
