Nga BoldNews.al
Një projekt për gurore në zonën e Delvinës, i hartuar nga kompania “Dinamika” ka ngritur pikëpyetje publike mbi pronësinë e zonës, ku është parashikuar të ndërtohet.
Sipas projektit, hapësira është në pronësi të Ministrisë së Infrastrukturës dhe Energjisë.
Ndërkohë që Jolio Dine, anëtar i Këshillit Kombëtar të Partisë Demokratike, në një status në rrjetet sociale deklaron se një pjesë e territorit të përfshirë në projektin e gurores është në pronësi të familjes Topulli.
Sipas Dines, “rezulton se Ministria e Infrastrukturës dhe Energjisë ka parashikuar të ndërtohet një gurore në pronë private”.
Ai deklaron gjithashtu se “projekti i ndërtimit të gurores përfshin një hapësirë në zonën e quajtur Qafa e Breshërit, në Bajkal, Delvinë”.
Sipas Dines, në fotot që shoqërojnë statusin në “Facebook”, dallohet se “projekti rezulton brenda sipërfaqes së pronës me nr. 818/1, në zonën kadastrale 2864, pronë e cila i përket familjes Topulli”.
Gjithashtu, Dine e shoqëron komentin e tij edhe me një informacion të përditësuar: “Sot (e Enjte), në Bajkal, kanë qenë përfaqësues të Ministrisë së Mbrojtjes, të cilët gjithashtu kanë konstatuar se projekti i gurores përfshin edhe një pjesë territori që është në pronësi të Ushtrisë”.
Ai e mbyll komentin e tij, duke theksuar se nuk ka “absolutisht asgjë me firmën sipërmarrëse, por mesa duket kjo gurore, për shumë arsye, nuk duhej planifikuar këtu, por në një vend tjetër, pa rrezikuar me ndotjen e saj dhe duke patur dakordësinë qeveri-firmë-banorë”.
Projekti për guroren në Qafën e Breshërit, i hartuar nga kompania private dhe i miratuar nga ish-ministri i Infrastrukturës, Damian Gjiknuri, aktualisht është në fazën e dëgjesave publike.
“Boldnews.al” mësoi nga burime zyrtare të Ministrisë së Infrastrukturës se, deri më tani, projekti ende nuk është pajisur me lejen përkatëse të shfrytëzimit.
Referuar procedurave ligjore, projekti duhet të pajiset më parë me leje mjedisore dhe më pas vijohet me procedurat për shqyrtim pranë asaj ministrie.
Nga sa rezulton deri më tani, projekti për guroren në Qafën e Breshërit nuk ka ende leje mjedisore.
