Komisioni i Vlerësimit të vetingut në polici ka zbuluar se Gjovalin Loka, ka qenë operativ i sigurimit të shtetit gjatë diktaturës komuniste. Por, për komisionin, kjo nuk është arsye për shkarkimin e zyrtarit të policisë, që e ka konfirmuar në detyrë Gjovalin Lokën.
Fakti që u bë i ditur në seancën dëgjimore, është fshehur nga Loka.
”Nga janari ’91 deri në qershor ’91 Gjovalin Loka ka qenë operativ i sigurimit të shtetit. Ndërkohë në përgjigjet e tij ka deklaruar se nuk ka qenë. Ndërkohë, deri në vitin 1990 ka qenë student në shkollën e sigurimit të shtetit. Komisioni i jashtëm do të vlerësojë nëse është apo jo kriter ndalues kjo situatë dhe gjetje ndaj z.Loka”, u tha nga trupa e vetingut.
”Mos më diskriminoni për shkak të studimeve të asokohe. Nuk kam kontaktuar me asnjë nga bashkëpunëtoret e sigurimit të shtetit. Nuk kam dënuar apo keqtrajtuar apo rekrutuar askën në sigurimin e shtetit”, u shpreh Loka.
Më tej, nga trupa gjykuese u bë me dije se ”Autoriteti i Dosjeve ka sjellë një raport t dytë ku thotë se z.Loka nuk ka firmosur asnjë dokument asokohe kur punonte si operativ në zonën e Bicajt, në Kukës.”
Loka mban postin e drejtorit të Departamentit të Sigurisë Publike në Drejtorinë e Përgjithshme të Policisë së Shtetit.
Gjovalin Loka u emërua drejtor në polici, me vendim të Ardi Veliut, Drejtorit të Përgjithshëm të Policisë, në vitin 2018.
Më parë ai ka qenë Drejtori i Policisë së Shkodrës, Vlorës dhe Lezhës.
