Në 28 qendrat shëndetësore verore, të vendosura përgjatë vijës bregdetare dhe në zonat turistike malore, janë dhënë mbi 19 mijë shërbime.
Kjo u bë e ditur nga ministrja e Shëndetësisë, Ogerta Manastirliu, e cila inspektoi qendrën shëndetësore në Shëngjin.
“Janë më shumë se 19 mijë shërbime të ofruara, 1500 prej konsultave, terapive të kryera dhe mjekimeve të marra në 28 qendrat shëndetësore verore kanë qenë për turistë të huaj”, tha Manastirliu.
Sipas saj, në qendrat shëndetësore verore do të vijojë të ofrohet shërbimi deri në fund të muajit gusht.
“Shërbimi nuk do të mungojë, do të vijojnë të jepen deri në fund të muajit gusht pa ndalur asnjë moment kujdesin shëndetësor, me fokus edhe tek të gjithë ato raste të dyshuara me COVID-19.
Janë më shumë se 80 raste të dyshuara deri tani, që janë referuar te epidemiologet, për të verifikuar gjendjen e tyre shëndetësore”, tha Manastirliu.
Në 28 qendrat shëndetësore verore shërbejnë 160 mjekë dhe infermierë 24/7, të trajnuar edhe për situatën e epidemisë.
Qendrat shëndetësore verore janë:
Razëm, Valbonë, Tamarë, Theth, Plazhi Currila, Gjiri i Lalzit, Darëzes, Zvërnec, Qeparo, Pogradec, Rrjoll, Tale, Velipojë, Shëngjin, Durrës, Shkëmbi Kavajës, Golem, Mali i Robit, Divjakë, Plazhi i Vjetër Vlorë, Radhimë, Dhërmi, Drimadhes, Himarë, Orikum, Ksamil 1, Ksamil 2, Borsh.
