Kreu i Lëvizjes “Vetëvendosja” në Tiranë ka reaguar për radhët e gjata të krijuara në Kakavijë.
Boiken Abazi kërkon trajtim njerëzor të qytetarëve shqiptarë.
“Prej 4 ditësh me mijëra shqiptarë janë bllokuar në kufirin me Greqinë në Kakavi në radhë kilometrike. I nevojiten shqiptarët Greqisë si krah i lirë pune, por jo si njerëz që duhen trajtuar me dinjitet e që u respektohen të drejtat. Kështu, pavarësisht radhës së gjatë dhe pritjes sfilitëse disa ditore të mijëra njerëzve, Greqia mbyll edhe kufirin gjatë natës.”
Ai shton se as nga pala shqiptare nuk ka ndonjë reagim për këtë situatë të krijuar, duke përmendur dhe humbjen e jetës së fëmijës 10 vjeç gjatë mëngjesit të së shtunës. Abazi thekson se “ky aksident tragjik nuk do kishte ndodhur po të mos kishte ndodhur keqtrajtimi në kufi nga pala greke dhe shpërfillja disa ditore e qeverisë shqiptare ndaj të drejtave dhe nevojave të qytetarëve të vendit.”
Ai i bëri thirrje qeverisë të marrë masa për këtë situatë.
