Kreu i Federatës Italiane të Futbollit, Karlo Tavekio, i është përgjigjur trajnerit Xhani De Biazi pas “kërcënimit” që ky i fundit i bëri Italisë për vendin e dytë në Grupin G për eliminatoret e Botërorit 2018.
“De Biazi na paska kërcënuar? Ne do të shkojmë të luajmë në Shqipëri me dëshirën për të fituar, si përherë. Do të bëjmë të pamundurën, që t’ia mbyllim gojën De Biazit”, tha Tavekio.
Një ditë më parë, trajneri italian i kuqezinjve, duke folur për mediat e vendit të tij, tha se “Shqipëria do të bëjë garë me Italinë”, duke nënkuptuar betejën për vendin e dytë në grupo, teksa pranoi superioritetin e Spanjës: “Po të isha trajner i Italisë do të përpiqesha për të mbërritur në sfidën ndaj Shqipërisë me vendin e dytë në xhep”, tha De Biazi.
