Artur Muçollari, i akuzuar nga ish-Kryeministri Sali Berisha si spiun, u largua nga detyra e zëvendës komandantit të Forcës Detare. Shkak për largimin nga kjo detyrë u bë një dasmë që Mucollari kishte lejuar të organizohej në një nga anijet ushtarake.
Mësohet se dhëndri nuk ishte vetë ushtarak, por dëshironte të organizonte ceremoninë e dasmës në anijen ushtarake pasi ishte djali i një ish-ushtaraku.
Sipas Ministrisë së Mbrojtjes një veprim i tillë nuk është konform rregullave të sigurisë dhe kjo ka sjellë edhe vendimin për shkarkimin e tij.
“Shkarkimi nga detyra ka ardhur pasi nuk ka respektuar rregullat e sigurisë dhe ka shkelur statusin e ushtarakut duke organizuar një event pa dijeninë e strukturave përkatëse”, thuhet në njoftimin e ministrisë.
Lidhur me rastin ka reaguar ish-ministri i Drejtësisë, Ylli Manjani, sipas të cilit Muçollari duhej të largohej nga Forcat e Armatosura dhe jo nga posti që mbante, pasi ai kthehu një anije ushtarake në një zuskë.
“Mbrojta që bën ushtaraku i lartë i Forcave Detare për anijen luftarake, të cilën e bënë si zuskë, është se “ka qenë porosi nga Ministria e Mbrojtjes”.
Kulmi!
Pikërisht për këtë arsye ky zotëri nuk mund të jetë jo në atë detyrë të lartë, por as pjesë e Forcave të Armatosura. Ka zbatuar ose ka lejuar zbatimin e një porosie haptazi jashtë zinxhirit komandues dhe për më tepër për qëllime private.
Dhe kur këto qëllime private çojnë në bërjen si zuskë të një anije lufte, dëmi është edhe më i rëndë. Ligjet e detit, për më tepër të mjeteve luftarake detare janë tepër strikte.
Kjo është llogjika normale bazuar në ligje për këtë çështje.
#ushtriaNATOsturpiiditës”, shkruan Manjani.
