Ditën e sotme u kap në brigjet italiane 734 kg lëndë narkotike Cannabis Sativa nga një operacion i përbashkët i Policisë së Shtetit me njësinë ajrore Frontex dhe Guardia di Finanza. Ky lajm e ka çuditur deputetin e PD-së Flamur Nokën i cili me ironi ka ngritur disa pyetje për ministrin e brendshëm Tahiri dhe për kryeministrin Rama.
“Droga çau detin por pasi u kap në Itali na del aksion i përbashkët . Po nëse është aksion i përbashkët, pse nuk ndalohet asnjëherë droga në Shqipëri, po gjithnjë në Itali”, shprehet Noka i çuditur me rasten e përsëritura të kapjes së gomoneve me drogë nga Shqipëria drejt brigjeve italiane. Sipas Nokës e vetmja meritë e kësaj qeveri janë rëndësia që i japin imazhit të tyre me anë të deklaratave në media.
Më herët mësuam se droga e kapur në brigjet italiane kishte në bord dy shtetas shqiptarë të cilët po transportonin kanabisin.
Ja deklarata e Flamur Nokës:
“Sërish 700 kilogramë drogë nga Shqipëria në Itali. Po nga del vallë kjo drogë, se Rama e Tahiri thonë nuk ka më kanabis në vendin tonë. Droga çau detin por pasi u kap në Itali na del aksion i përbashkët . Po nëse është aksion i përbashkët, pse nuk ndalohet asnjëherë droga në Shqipëri, po gjithnjë në Itali. E vetmja meritë e Ramës e Tahirit është që kur droga kapet në brigjet fqinjë, këta të dy bëjnë një deklaratë për mediat.”- është shprehur ai.
Ja njoftimi i policisë për kapjen e gomones me drogë:
Tjetër operacion i përbashkët mes Policisë së Shtetit dhe Policisë Italiane. Sekuestrohet në Torre Chianca – Leçe, një gomone me 734 kg lëndë narkotike Cannabis Sativa.
Policia e Shtetit njofton se, në orët e para të mëngjesit së ditës së sotme njësitë aerodetare të Guardia di Finanza pas sinjalizimeve të dhëna nga Policia e Shtetit kanë arritur të ndalojnë një gomone rreth 6 m, me dy shqiptarë me inicialet A.P. 43 vjeç dhe G.S. 39 vjeç në bord, të cilët transportonin rreth 734 kg Kanabis.
Gomonia kishte dy motorë prej 250 Kuaj-fuqi dhe një tjetër motor rezervë në bord. Të ndihmuar nga njësia ajrore e Frontex me avion dhe helikopter të Guardia di Finanza është bërë i mundur ndalimi dhe sekuestrimi i gomones. Personat në bord janë arrestuar nga autoritetet policore italiane. Policia e Shtetit ka shkëmbyer në kohë informacion me GdF dhe po punohet bashkarisht për hetimin e ngjarjes.
Lidhur me këtë ngjarje ka reaguar edhe deputeti i PD, Flamur Noka duke ngritur pyetje se nga po del kjo sasi droge.
