Një tjetër sasi e madhe droge është sekuestruar në brigjet italiane e ardhur nga Shqipëria. Mediat italiane raportojnë se policia italiane ka sekuestruar këtë të martë rreth 730 kg marijuanë në një gomone në zonën e Leçes.
Policia ka arrestuar dy trafikantë shqiptarë, emrat e të cilëve nuk bëhen publikë. Gomonia u sekuestrua në orët e para të mëngjesit pas informacioneve të mbledhura në rrugë operative.
‘Në orët e para të mëngjesit së ditës së sotme njësitë aerodetare të Guardia di Finanza pas sinjalizimeve të dhëna nga Policia e Shtetit kanë arritur të ndalojnë një gomone rreth 6 m, me dy shqiptarë me inicialet A.P. 43 vjeç dhe G.S. 39 vjeç në bord, të cilët transportonin rreth 734 kg Kanabis”, njofton policia shqiptare.
Gomonia kishte dy motorë prej 250 Kuajfuqi dhe një tjetër motor rezervë në bord. “Të ndihmuar nga njësia ajrore e Frontex me avion dhe helikopter të Guardia di Finanza është bërë i mundur ndalimi dhe sekuestrimi i gomones”, deklaron policia.
