Partia Demokratike vijon të akuzojë kreun e Bashkisë Erion Veliaj për censurë ndaj mediave duke cenuar lirinë e fjalës referuar mbylljes së emisionit investigativ “Publicus” në Vizion Plus.
“Erjon Veliaj, jo vetëm mbylli një program televiziv që kishte investiguar rreth aferës së tij korruptive e kriminale në Sharrë, por ai nuk lejoi dje as transmetimin e denoncimit të Partisë Demokratike në lidhje me këtë skandal të rëndë të cënimit të lirisë së medias, të lirisë së fjalës.
Denoncimi ynë dje nuk u dha nga pjesa më e madhe e medias, që gjendet nën kontrollin e rreptë të pushtetit. Nën kontrollin e Edi Ramës dhe dorës së tij të zgjatur në tërë aferat korruptive e kriminale të Bashkisë së Tiranës, që është Erjon Veliaj”, tha Duma.
Ajo e ka quajtur Veliajn një mashtrues të pafytyre që fshihet pas pamjeve me bicikletë e me tuta e që po bën gjithcka që të fshehë të vertetën për vdekjen e një 17-vjecari në landfillin e tij, duke i mbyllur gojën medias, dhe duke kërkuar t’i heqë zërin edhe opozitës së vendit.
“Kjo censura e dyfishtë edhe pse dëshmon se kush janë në të vërtetë Erjon Veliaj dhe Edi Rama, është një turp për vendin, për shoqërinë dhe mediat tona. Po i drejtohemi sot mediave të vendit me mesazhin që të mos bëjë kompromis me këto ngjarje të rënda, të mos pranojë harresën që kërkon të vendosë Veliaj mbi vdekjen e një 17-vjecari të pafajshëm. Ne e dimë se jeni në kushtet e presionit, kërcënimit dhe joshjes, por është në nderin tuaj të ruani lirinë e shprehjes, arsyeja kryesore për ekzistencën e medias”, tha Duma.
Ajo theksoi se Partia Demokratike nuk do të heqë dorë asnjë ditë nga denoncimi i aferave korruptive e kriminale si ajo e Sharrës, e aq më tepër nga denoncimi i presionit ndaj medias.
“Pika e vlimit po afron. Edi Rama dhe Erion Veliaj mund të errësojnë ekrane e pushojnë gazetarë, por nuk do ta ndalin revoltën e popullit që po rritet përdite kundër sundimit të tyre të korruptuar e kriminal”, deklaroi ajo.
