Nga Blendi Fevziu
Për një vend të vogël dhe me njohje modeste ndërkombëtare si Shqipëria, cdo eveniment për ta sjellë atë në vëmendjen e mediave botërore është një bonus i pacmueshëm. Kjo mund të ishte mënyra më e mirë dhe padyshim më e duhura për të parë dhe komentuar dasmën e Pric Lekës me Elja Zaharian.
Dasma që u mbajt këtë fundjavë në Tiranë, padyshim që e arriti këtë objektiv.
Në Pallatin ku Mbreti Zog kishte vendosur të kalonte jetën me Mretëreshën Geraldinë, po ku nuk hyri dot, kurrë, Leka ja arriti të mblidhte një miksim mjaft interesant përfaqësuesish të familjeve mbretërore europiane, në fuqi apo jashtë pushtetit, miq të Shqipërisë, personazhe të njohur dhe mbi të gjitha gazetarë ndër më në zë të kontinentit.
Në darkën me afro 300 të ftuar, thuajse 200 e ca prej tyre ishin të huaj. Të huaj shumica e të cilëve e vizitonin për herë të parë Shqipërinë dhe që sic u shprehën e kishin gjetur atë shumë më ndryshe se sa imazhi që kishin përpara se sa të mbërrinin këtu. Në listën e të ftuarve përfshiheshin Ish Mbretëresha Sofia e Spanjës, e cila ka qenë në fron për disa dekada deri disa vjet më parë, njëkohësisht nëna e Mbretit aktual të Spanjës; ish Perandoresha Farah Diva e Iranit, gruaja e Shahut Mohamed Riza Pahlevi, një nga personazhet më të komentuar në botë për kujtimet e saj publikuar në 2003; Princesha Llalla Meryem e Marokut, vajza e Mretit Hasan i II dhe motra e mbretit aktual Muhamed i Marokut; Princi Mishel i Greqisë; Maria Pia si Savoia de Bourbon e Parmes dhe thuajse 100 përfaqësues të tjerë të familjeve mbretërore europiane. Disa prej të cilave ende në fuqi në vendet e tyre.
Në sallë ishin po ashtu personazhe të njohur të mediave dhe politikës. Ish Sekretari i Shtetit për cështjet Europiane i Francës Reno Myselie, ish Ministri i Kulturës i Francës dhe një ndër personazhet më të njohur të televizonit në Francë, Frederik Miteran, nipi i ish Presidentit Miteran; gazetarë me ndikim të mediave franceze e britanike.
Dasma arriti të tërheqë vëmendjen e disa mediave europiane. Ato e kanë përshkruar me tone mjaft pozitive. Pas përfaqësimit të Shqipërisë në Europian, kjo është hera e dytë që për Shqipërinë flitet pozitivisht në shtypin e huaj. Zakonisht ne tërheqim vëmendje vetëm me anën negative.
Edhe pse Leka Zogu nuk ka asnjë pretendim mbi fronin, edhe pse ai ka zgjedhur te këtë një jetë të tërhequr dhe jashtë ceremonive, ai ja arriti të sjellë në dasmën e tij më shumë personazhe të njohur se sa i jati në dasmën që organizoi në Madrid në 1975 madje edhe më shumë familje mbretërore se sa solli i gjyshi në dasmën e famshme të vitit 1938. Dasmën që njihet si më mediatikja ndërkombëtarisht në historinë e Shqipërisë.
Në 2002 kur Simeoni i Bullgarisë vendosi të organizojë në vendin e tij dasmën e vajzës, Kalina, mediat bullgare dhe ato ndërkombëtare e quajtën atë një operacion të shkëlqyer PR për Bullgarinë. Le ta shohim edhe dasmën e Lekës me Eljan si një event të tillë dhe në këtë vështrim ajo ja arriti plotësisht qëllimit.
Të gjithë debatet e tjera. Ato mbi historinë dhe rolin e Zogut në të. Ato mbi pretendimet e familjes apo mbi rolin e saj, sot nuk kanë vlerë. Historia ka kohë dhe do ketë kohë të merret me to. Dasma mbaroi dje. Dhe ajo ja arriti të ishte ashtu sic do ta donte gjithkush: një dasëm e paharruar për dy të rinj dhe nje event i rëndësishëm për imazhin e Shqipërisë./opinion.al
