Xhani De Biazi mendon se Spanja mund të ndalet vetëm nëse lojtarët e Kombëtares japin 101 për qind në ndeshjen e nesërme.
Në konferencën për shtyp të mbajtur sot në “Loro Boriçi”, trajneri kuqezi theksoi se ekipi i tij ka ende shumë për të dhënë.
“E kemi arritur mrekullinë me pjesëmarrjen në Kampionatin Europian, por tani pjesa më e vështirë është ta mbajmë në këmbë. Megjithatë, unë jam i bindur se ky grup lojtarësh ka mundësi të japë shumë më tepër”, u shpreh mes të tjerash tekniku italian, i cili iu përgjigj në spanjisht pyetjeve të gazetarëve.
Për Sadikun
“Është mungesë e madhe, për atë çka ka bërë kohët e fundit. Ai është një lojtar shumë i rëndësishëm për ne. Megjithatë, edhe futbollistët e tjerë që kemi janë të fortë dhe besoj se do të bëjmë që mungesa e tij të ndjehet sa më pak duke përdorur mënyra të tjera loje”. Për objektivin ndaj Spanjës “Unë besoj se futbolli nuk është vetëm numra, skemë dhe taktikë, por edhe ekuilibër duke marrë më të mirën nga karakteristikat dhe aftësitë e lojtarëve, duke marrë 101 për qind për prej tyre. Këtë do të synojmë të bëjmë edhe nesër, duke u përpjekur të shfrytëzojmë ato mundësi që do të na krijohen”.
Për Kukelin
“Pësoi një dëmtim në fundin e pjesës së parë në Lihtenshtejni dhe nuk e dimë nëse do të rikuperohet deri nesër. Është shumë i rëndësishëm për ne dhe do të përpiqemi maksimalisht ta riaftësojmë. Nëse nuk ia del, do rrijë në stol”. Për ecurinë e skuadrës “E kam deklaruar edhe herë të tjera: e kemi arritur mrekullinë me pjesëmarrjen në Kampionatin Europian, por tani pjesa më e vështirë është ta mbajmë gjallë këtë mrekulli. Megjithatë, unë jam i bindur se ky grup lojtarësh ka mundësi të japë shumë më tepër”.
Shanset për ta ndalur Spanjën
“Ne jemi të ndërgjegjshëm për aftësitë e ekipit tonë. E dimë që jemi të vegjël para kundërshtarit dhe diferencat janë shumë të mëdha. Gjithsesi, nesër do të zbresim në fushë për të bërë lojën tonë, duke luajtur në mënyrë të zgjuar. Edhe me Portugalinë askush nuk na jepte ndonjë shans, por ndeshjen e fituam ne. Futbolli i tillë është”.
Për Spanjën
“Spanja vjen nga një periudhë e suksesshme me Del Bosken, ku fitoi tre trofe radhazi. Më pas pati një periudhë rënieje dhe tani me Lopeteguin lojtarët po rizgjohen, pasi kanë të bëjnë me një trajner të ri. Megjithatë shpresojmë që nesër të mos jenë në formën e tyre më të mirë”. A do të parkojë autobusin? “Nuk e di nëse do të kemi autobus aq të madh për ta mbuluar portën. Nëse e bëjmë, do ta vëmë pa rrota, që të mos na hyjë topi poshtë. (qesh) Gjithsesi, përgjigjja jonë për të përdorur këtë mënyrë mbrojtjeje vjen edhe si rezultat i mënyrës që ka kundërshtari për të na sulmuar”. Panorama
