Lëvizja Vetëvendosje në Shqipëri përmes një deklarate shprehet se u duhen dhënë fund lojërave me të drejtën e votës së mërgatës.
VV në Shqipëri thekson se Parlamenti miratoi disa ndryshime në Kodin Zgjedhor që kanë të bëjnë edhe me të drejtën e votës për qytetarët që jetojnë jashtë vendit.
“Ligji e ngarkon KQZ-në me organizmin dhe administrimin e këtij procesi, duke lënë fillimisht të kuptohet se kjo e drejtë do mund të ushtrohet në “zgjedhjet vijuese”. E përshëndesim në parim këtë ndryshim ligjor, por ka shumë çështje që mbesin në ajër lidhur me realizimin e kësaj të drejte.
Nëntë muaj para zgjedhjeve mungon kalendari i punës, aktet nënligjore, dhe procedurat e votimit për realizimin e të drejtës së votës për bashkatdhetarët. Për më shumë, palët e përfshira në vendimmarrje kanë shprehur skepticizmin e tyre për manipulime të mundshme edhe për votimin me postë, edhe për votimin në ambasada dhe konsullata jashtë vendit, edhe për votimin elektronik – i cili aktualisht as nuk është pilotuar. Pra, nuk ka një dakordësim për mënyrën se si do të votojnë shqiptarët që jetojnë jashtë vendit.
Ligji parashikon edhe përditësimin e Regjistrit Kombëtar të Gjendjes Civile i cili kërkon një punë voluminoze nga ana e stafit të KQZ-së, që do ketë nevojë për kapacitete të shtuara për t’i kryer të gjitha punët në kohë.
Ndryshimet po bëhen në një moment kur ende nuk dihet se çfarë do të ndodh me Kodin Zgjedhor për shkak të projekt-ligjit për ndryshimet kushtetuese, duke shkaktuar paqartësi edhe për pragun zgjedhor, listat, koalicionet dhe zonat zgjedhore”, thuhet në deklaratën e VV dega Shqipëri.
Sipas VV, e drejta votës u është mohuar 30 vite rresht qytetarëve që jetojnë jashtë vendit.
“Sipas Bankës së Shqipërisë, bashkatdhetarët tanë kontribuojnë çdo vit me dërgesa financiare që shkojnë në nivelin e ¼ së buxhetit të shtetit. Por, të përjashtuar nga vendimmarrja, ata janë ndier të huaj e shpesh të diskriminuar jo vetëm në vendet pritëse por edhe në vendin e tyre.
Bashkatdhetarët tanë nuk janë vetëm burim të ardhurash, por kanë një potencial të jashtëzakonshëm për të kontribuar në çdo sektor në Shqipëri. Kush e njeh historinë e shqiptarëve njeh edhe rolin vendimtar që ka luajtur diaspora jonë prej Rilindjes kombëtare në çlirimin dhe emancipimin e vendit.
Lëvizja VETËVENDOSJE! e ka berë gjithë rrugëtimin e saj në bashkëpunim të ngushtë me shqiptarët që jetojnë në diasporë, dhe jemi thellësisht mirënjohës për gjithë kontributin e tyre në rritjen dhe fuqizimin e organizatës tonë, ashtu siç jemi të bindur që transformimet e mëdha në Shqipëri mund të realizohen vetëm duke përfshirë mërgatën në të gjitha proceset politike, ekonomike, sociale dhe kulturore të vendit.
Është ofenduese, nëpërkëmbëse dhe vazhdim i padrejtësisë nëse këto ndryshime në Kodin Zgjedhor janë bërë thjesht si lojë fushate elektorale, pa synimin për t’i realizuar ato në zgjedhjet e radhës. Do ta ndjekim këtë proces nga afër, dhe do të kërkojmë me ngulm realizimin e kësaj të drejte themelore, pasi vonesat dhe pengesat janë të papranueshme”, thekson VV.
