Ambasadorja amerikane në Tiranë, Yuri Kim, ka zhvilluar sot një takim, larg vëmendjes së mediave, me ish-Kryeparlamentaren Jozefina Topalli. Takimi është zhvilluar në një nga lokalet e zonës së ish-Blllokut dhe mësohet se ka zgjatur mbi 1 orë.
Takimi mes diplomates amerikane dhe Topallit, ish-nënkryetare e PD-së për 16 vite, është zhvilluar në të njëjtën kohë kur vëmendja ishte në Kuvend, atje ku pritej të votohej marrëveshja e 5 qershorit e dakordësuar në Këshillin Politik mbi Zgjedhoren.
Mësohet se në qendër të takimit ka qenë situata politike në vend, ndërsa mësohet se dy nga çështjet që kanë tërhequr vëmendjen ishin listat e hapura të kandidatëve, por edhe përzgjedhja e kandidatëve për deputet.
Gjithashtu është diskutuar mbi tezën e ndryshimeve Kushtetuese, për të cilat Edi Rama dhe ajo që konsiderohet si “opozita” parlamentare kanë firmosur edhe një marrëveshje, por që kundërshtohet nga Opozita e Bashkuar e drejtuar nga PD.
Qoftë Topalli ashtu edhe nga ambasada e SHBA kanë shmangur komentet zyrtare mbi takimin, i cili u parapri nga një deklaratë e Yuri Kim, e cila paralajmëronte liderët e partive politike se do të mbanin përgjegjësi për kandidatët që do të përfshinin në listat e tyre për deputet.
Nga raportimet është mësuar se Topalli ka qenë një ndër emrat e propozuar nga strukturat e PD-së në Shkodër për të kandiduar në këtë qark si deputete, por emri i saj është në një listë e cila përfshin gati 100 emra vetëm në këtë qark.
