Kreu i PAA-së, Agron Duka, ka vlerësuar votimin e sotëm në Kuvend të marrëveshjes së 5 qershorit.
Në një deklaratë për mediat, Duka thotë se me miratimin e kësaj marrëveshje plotësohet një prej kushteve më të rëndësishme të BE-së për ҫeljen e negociatave dhe fillimin e zgjidhjes së krizës politike më të gjatë që ka kaluar tranzicioni shqiptar.
Kreu i PAA-së thekson se tashmë është koha që të fillojë organizimi i partive politike për zgjedhjet e ardhshme parlamentare, ndërsa thekson se proceset përzgjedhëse të kandidatëve për kryetar bashkie dhe deputetë të jenë sa më demokratike e transparente, si dhe të shkëputen lidhjet me krimin.
“Tani është koha që partitë politike të fillojnë organizimin e tyre për zgjedhjet e ardhshme vendore dhe parlamentare duke konkuruar me programe konkrete për të zbutur krizën e rëndë që po kalon vendi dhe me strategji, politika dhe projekte konkrete që ndihmojnë ringritjen dhe zhvillimin ekonomik si dhe stabilitetin e financave publike.
Kriteret dhe proceset perzgjedhëse të kandidatëve për kryetar bashkie dhe deputet duhet të jenë sa më demokratike dhe transparente. Demokratizmi i partive politike është parakusht për demokratizmin e Shqipërisë. Shkëputja e lidhjeve me krimin, lufta kundër korrupsionit dhe kapjes së shtetit janë sot më jetike se kurrë”, nënvizon Duka.
