Kreu i PD-së, Lulzim Basha, ka kryer homazhe tek varri i ish-Presidentit të ndjerë të Kosovës, Ibrahim Rugovës, ndërsa tha se figura e tij do të mbetet frymëzim për breza të tërë politikanësh.
Me një postim në rrjetet sociale, Basha e konsideron Rugovën si “arkitekt të Kosovës së pavarur”.
“Vizioni, përkushtimi, dhe vepra e tij për paqe, liri, dhe pavarësi, e kanë lartësuar përgjithnjë Presidentin Rugova në altarin e shenjtë të historisë së Kosovës dhe mbarë kombit shqiptar“, shkruan Basha mes të tjerash.
“Një moment i veçantë për mua, sa herë që shkoj në Kosovë, është nderimi i arkitektit të Kosovës së pavarur Presidentit Ibrahim Rugova.
Dr. Ibrahim Rugova u bë nismëtar i një lëvizje madhore për liri, kur të paktë ishin ata që guxonin ta arrikulonin këtë ide, nën dhunën dhe terrorin serb.
Ideja e tij e parashtruar para miqve e partnerëve ndërkombëtarë se Pavarësia e Kosovës do ta paqtonte gjithë rajonin, është sot një realitet.
Vizioni, përkushtimi, dhe vepra e tij për paqe, liri, dhe pavarësi, e kanë lartësuar përgjithnjë Presidentin Rugova në altarin e shenjtë të historisë së Kosovës dhe mbarë kombit shqiptar”, shkruan Basha.
Sipas tij, Ibrahim Rugova do të mbetet frymëzim për breza të tërë politikanësh që vendin dhe popullin e tyre e vënë përpara interesit personal.
“Nderim përjetë veprës së ndritur të Presidentit Ibrahim Rugova”, e mbyll postimin kreu demokrat.
