Pas denoncimit të Partisë Demokratike për kapjen e mbi 50 kg drogë në banesën e kushërinjve të deputetit socialist Xhemal Qefalia, policia e shtetit publikon informacione.
Mësohet se janë vënë në pranga dy vëllezër me mbiemrin Qefalia si dhe janë sekuestruar 59 kg Canabis Sattiva.
Gjatë orëve të mbasdites së sotme (07.10.2016), Specialistët për Hetimin e Krimit në Komisariatin e Policisë nr 5, kanë marrë informacion në rrugë operative se shtetasi Haxhi Qefalia ishte duke futur një sasi lënde narkotike në një banesë në fshatin Priskë e Vogël të Njësisë Administrative Zallherr.
Shërbimet policore kanë shkuar menjëherë në adresën e dhënë ku gjatë kontrollit të banesës të marrë me qira nga shtetasi Haxhi Qefalia, është konstatuar një sasi lënde narkotike e dyshuar si canabis sattiva, ku pas peshimit rezultoi me një peshë 55.3 kg.
Gjithashtu nga veprimet e shpejta policore është kapur në flagrancë në një distancë rreth 20 m, larg kësaj banese në tentativë për t’u larguar shtetasi Vullnet Qefalia, i cili u kap me një sasi lënde narkotike e dyshuar si canabis sattiva, ku pas peshimit rezultoi 3.7 kg.
Lënda narkotike e dyshuar si canabis sattiva u sekuestrua në cilesinë e provës materiale.
Në përfundim të veprimeve të para procedurale u bë arrestimi në flagrancë i shtetasve:
1- Haxhi Qefalia, 36 vjeç, lindur dhe banues në fshatin Priskë e vogël të Njësisë Administrative Zallherr.
2- Vullnet Qefalia, 31 vjeç, lindur dhe banues në fshatin Priskë e vogël të Njësisë Administrative Zallherr. (Vëllezër me njëri -tjetrin)
Gjithashtu u proçeduan në gjendje të lirë shtetasit:
– Sh. K., 53 vjeç, lindur dhe banues në fshatin Priskë e vogël të Njësisë Administrative Zallherr.
– Xh. K, 53 vjeçe, lindur dhe banues në fshatin Priskë e vogël.
Nga veprimet e para hetimore dyshohet se shtetasit e proceduar në gjendje të lirë (bashkëshortë me njeri-tjetrin) ishin pronarët e banesës ku u gjet lënda narkotike të cilën ia kishin dhënë me qira gjysmën e banesës shtetasit H.Qefalia dhe në pjesën tjetër të kësaj baneseje jetonin vetë.
Materialet procedurale do t’i dërgohen Prokurorise pranë Gjykatës Rrethit Gjyqësor Tirane, për veprën penale “Prodhim ,mbajtje dhe shitje të bimëve narkotike”, parashikuar nga neni 283 i Kodit Penal, në ngarkim të shtetasve Haxhi Qefalia dhe Vullnet Qefalia, si dhe për veprën penale të “Moskallëzimit të krimit” parashikuar nga neni 300 i Kodit Penal, në ngarkim të dy bashkëshortëve.
