Fondi Monetar Ndërkombëtar (FMN) ka paralajmëruar se ekonomia më e madhe e botës, ajo e SHBA, do të tkurret këtë vit me 6,6%. Rimëkëmbja e ekonomisë amerikane është në dyshim, së paku edhe për muajt e mbetur të 2020-s, pasi pandemia ka shkatërruar së pari, sipas FMN-së, biznesin amerikan dhe xhepat e konsumatorëve mbi të gjitha.
FMN sugjeron që qeveria amerikane të injektojë më shumë para’ në ekonomi, për të siguruar mbështetjen e nevojshme për qytetarët e saj dhe për të nxitur kërkesën dhe kjo, sipas institucionit financiar, është mënyra e vetme për të shmangur varfërinë.
Sipas FMN-së, SHBA vuajti një rënie të PBB prej 37% në tremujorin e dytë të këtij viti dhe paralajmëron në parashikimin e saj vjetor se ekonomia amerikane do të tkurret me 6,6% deri në fund të vitit, pasi përballet me paqartësi në shumë sektorë, që konsiderohen jetik për vendin.
Shtetet më të goditura edhe ekonomikisht pritet të jenë Florida, Xhorxhia, Teksasi dhe Kalifornia, që këtë vit kanë vuajtur edhe mungesën e të ardhurave nga turizmi.
