Kukësi luan nesër në orën 20:45 në Shkodër ndaj Vllaznisë. Të besuarit e Orges Shehit do të duan të harrojnë atë eliminim nga Kupa e Shqipërisë në mesjavë nga Teuta, duke kërkuar kthesën në “Loro Boriçi”.
Përpara ndeshjes ka folur trajneri Orges Shehi, që kërkon përqendrim maksimal te ndeshja e nesërme e Kategorisë Superiore, duke thënë se verilindorët janë ende në lojë për objektivin madhor që është triumfi në kampionat.
Ndeshje nesër ndaj Vllaznisë, është tejkaluar eleminimi në Kupë nga Teuta?
Nesër kthehemi në kampionat, kompeticion tjetër, vijmë pas një ndeshje të mirë në tërësi, por futbolli i tillë është. Kështu që do të fokusohemi te ndeshja nesër dhe jo te ajo që lamë pas.
Vllaznia i ka sjellë problem Kukësit, do ia dilni në “Loro Boriçi”?
Jemi në një situatë që kanë mbetur tre ndeshje, do të bëjmë maksimumin nesër. Jemi ende në lojë për objektivin madhor që kemi. Është një ndeshje e një shkalle vështirësie të lartë e do të bëjmë maksimumin tone.
