Sapo janë mbyllur dy takimet hapëse të javës së 34-t në Kategorinë Superiore.
Tirana e ka pasur të lehtë ndaj Flamurtarit teksa iu imponua me rezultatin 2-0. Një takim i dominuar nga bardheblutë të cilët shënuan një gol në çdo pjesë. Fillimisht rezultatin e zhbllokoi Ernest Muçi në minutën e 21-të. 19-vjeçari u tregua i saktë nga pika e bardhë e penalltisë dhe arriti golin numër 7-të në këtë sezon.
Ndërkohë goli që mbylli llogaritë e sfidës, u realizua nga mbrojtësi Ismajlgeci në të 67-ën. Mbrojtësi i krahut të majtë, Ismajlgeci, konkretizoi me gol një aksion model të bardhebluve, që nisi nga këmbët e Cobbinah dhe përfundoi me një goditje të fuqishme të 20-vjeçarit.
Ndeshja tjetër mes Luftëtarit dhe Skënderbeut e luajtur në Gjirokastër, përfundoi 0-1 në favor të korçarëve. Heroi i sfidës ishte Blerim Krasniqi. Pas disa rasteve të humbura më herët gjatë ndeshjes, Sulmuesi gjuan saktë me kokë pas krosimit të Gripshit duke realizuar në minutën e 75-të.
